BUTUAN CITY – Nagpabiling anaa sa maayong kondisyon ang ika-upat nga natahong kumpirmadong kaso sa coronavirus disease 2019 sa Caraga Region kansa usa ka health worker sa Caraga Regional Hospital kon CRH sa Surigao City.
Sa pagpakighinabi sa Bombo Radyo Butuan kang Ma. Cecilia Bayana, information officer sa CRH, gipadayag niining nakasinati lamang og ocassional nga pag-ubo ang pasyente ug gihimo na usab ang follow up swab test rason nga gihulat na lamang nila ang resulta niini.
Sumala ni Bayana, gihimo na sa ilang kadumalahan ang contact tracing sa tanang nakahugoy-hugoy sa na-admit nga 37-anyos nga babayeng health worker ug gipa-ilalom na usab sa kwarantina ang na-identify na nga dunay personal contact sa pasyente dungan sa pagbutyag nga mismo silang mga health workers, nakasinati usab og diskriminasyon sa mismong syudad nga ilang giserbisyuhan.
Mi-apela usab ang kadumalahan sa Caraga Regional Hospital ngadto sa katawhan nga ihunong na ang pagpakatag og personal nga impormasyon ug litrato ilabina diha sa social media sa maong health worker agi’g respeto kanila ug sa ilang pamilya.
Gidugang pa niining mamahimong kasuhan ang si bisan kinsang mapatud-ang nagpakatag sa personal nga impormasyon sa maong health worker.
Mihimo na usab og decontamination kon disinfection ang barangay council pagpanguna ni Canlanipa Brgy. Captain Joel ‘Jojo’ Cambalon ilabina sa purok nga gipuy-an sa maong pasyente kondiin gipa-ilalom na usab sa duha ka adlaw nga temporary closure .
