BUTUAN CITY – All systems go na alang sa pagpahigayon sa Caraga Regional Athletic Games kon CRAG 2025 sunod semana nga himoon sa lungsod sa Nasipit, Agusan Del Norte.
Sigon ni Pedro Tecson, tigpamaba sa Department of Education kon DepEd-Caraga, ginagmay nga pagpangandam na lang ang gihimo sama sa logistics tungod kay andam naman ang mga billeting quarters, mga atleta ug officiating officials.
Kagahapon, gisugdan na usab ang final interview ug screening sa mga atleta pinaagi sa Regional Screening Committe nga laumang matapos sa Marso 28 diin sa maong adlaw, himoon usab ang solidarity meeting sa mga coaches. Sa Marso 29 duna nay mga advance games nga himoon sama sa basketball og uban pang outdoor games.
Sa Marso 30 himoon ang opening ceremony nga sugdan sa Santos nga Misa sa ala-1:30 sa hapon sa parokya sa St Michael sa maong lungsod nga sundan sa pag-assemble sa Plaza alang sa himoong parada. Pagka-gabii himoon ang fellowship samtang sa Marso 31 hangtud sa Abril 4 mao ang pormal nga pagsugod sa tanang mga dula.
Gipahibalo na lang ni Tecson nga sugod sa alas 10:00 sa buntag ngadto sa alas 3:00 sa hapon suspendido ang pagpahigayon sa mga outdoor games tungod sa init sa panahon.
