BUTUAN CITY – Wala pa’y tunghaan dinhi sa Caraga Region nga nag-request nga magsuspende sa ilang klase tungod sa grabeng ka-init sa panahon kon heat index nga nasinatian, apil na sa pipila ka lugar sa nasud tungod sa epekto sa climate change.
Sa eksklusibong pakighinabi sa Bombo Radyo Butuan, gibutyag ni Pedro Tecson, tigpamaba sa Department of Education kon DepEd-Caraga nga duna na’y guidelines kalabot niini ang ilang ahensya pinaagi sa DepEd Order No. 7, series of 2022 ilabina kung mabati sa mga school heads nga dili na conducive sa pagtuon sa mga bata ang ka-init sa sulod ug gawas sa classrooms.
Ilalom sa maong kamanduan, duna matud pa’y kagahom ang mga school heads nga magsuspende sa klase kansa applicable usab kung duna’y linog, bagyo, pagbaha ug uban pa base na usab sa advisory sa mga local government units ug sa mga hingtungdang ahensya sa kagamhanan.
Kung wala matud pa’y ipagawas nga advisory, duna’y kagahom ang mga school heads nga mag-shift og klase gikan sa in-person ngadto na sa distance learning aron magpadayon ang pagtuon sa kabataan.
