BUTUAN CITY – Isugyot ni Dr. Jose Llacuna Jr, regional director sa Department of Health kon DOH-Caraga ang duha ka semanang extension sa enhanced community quarantine (ECQ) dinhi sa rehiyon.
Sumala ni Dr. Llacuna iyang irekomenda sa Regional Task Force-One Caraga Shield sa ilang panagtagbo karong adlawa ang paglugway sa quarantine period ingon man ang pagpadayon nga pagsira sa mga utlanan ngadto sa mga silingang rehiyon.
Gipadayag usab niining sayo pa kaayo aron lu-agan ang ECQ sa rehiyon ngadto sa General Community Quarantine kon GCQ ilabina nga padayon ang pagsaka sa ihap sa mga bag-ong na-infect ingon man ang mga suspected COVID-19 cases.
Bisan matud pa og gi-classify ang Caraga Region nga low-risk area ug kwalipikado sa GCQ, nagtuo sa Dr. Llacuna nga ang padayong pagsira sa mga ultanan, usa ka maayong aksyon aron mapugngan ang pagkaylap pa sa sakit.
Madumdumang niadtong Abril 1, nagkasinabot ang mga lideres sa Caraga Region nga isira ang tibuok rehiyon isip pagsanong sa istratehiya sa gobyerno aron malimitahan ang lihok sa mga tawo sa ingon mapugngan ang pagkaylap sa COVID-19 infection.
