BUTUAN CITY – Gipailalom na sa Enhanced Community Qiuarantine ang tibook Caraga Region human nakatala pg pinakaunang kaso sa Coronavirus Disease o Covid-19.
Sa gihimong panagpulong kaganina lang sa Caraga Regional Task Force on Covid-19, gi-aprubahan ang resolution nga nagdeklarang sa ECQ.
Nasayrang mihimo na og contact tracing ang mga personahe sa Department of Health kon DOH-Caraga sa mga pasaherong nakasakay sa unang COVID-19 case sa Caraga Region dihang mipa-uli kini dinhi sa rehiyon human nagpakunsulta sa kauluhang Manila.
Kini human gikumpirma kaganinang buntag sa Southern Philippines Medical Center (SPMC) ngadto sa DOH Caraga nga nagpositibo sa maong sakit ang sample gikan sa usa ka 68-anyos nga lalaking Patient Under Investigation kon PUI.
Sa eksklusibong pakighinabi sa Bombo Radyo Butuan, gipadayag ni DOH-Caraga Regional Director Jose Llacuna Jr., nga ang maong pasyente miadto sa kauluhang Manila aron magpakunsulta ug mipa-uli sa Marso 12 diin siya gi-home quarantine hangtud nga gihilantan, miharat ang tutunlan ug gi-ubo rason nga na-admit na sa Marso 28.
Dali ra matud pa kining mataptan sa maong Coronavirus tungod sa iyang pre-existing medical condition sama sa balik-balik nga sakit sa baga sama sa emphysema ug bronchitis gawas nga diabetic pa siya.
Nakig-alayon na sila sa Civil Aviation Authority of the Philippines kon CAAP aron makakuha og flight manifesto sa eroplanong gisakyan sa biktima sa ingon ilang ma-trace ang mga pasaherong nakasakay niini uban sa pag-abag sa militar ug sa local government units.
Muhimo sila pag-usab og swab test sa biktima aron ma-monitor ang kondisyon sa iyang panglawas taliwa nga sa kasamtangan, maayo ang panglawas niini base na usab sa pagkumpirma sa iyang doktor.
