BUTUAN CITY – Gipaneguro ni Veralew De Vera, regional director sa National Food Authority kon NFA-Caraga nga dunay igong stock sa bugas ang rehiyon.
Sigon sa opisyal nga sa kasamtangan dunay 65-mil ka bags sa palay nga kung galingon muabot sa 41-mil ka bags sa bugas ang mga bodega sa buhatan nga madugang sa kasamtangang 13-mil ka bags sa bugas.
Sumala ni De Vera nga mandatu sa ilang buhatan ang pagbaton og bufferstock aron dunay gamiton sa mga relief operation sa panahon sa kalamidad og emerhensiya.
Aminado usab kini nga dunay epekto sa suplay sa bugas ang kapin 5-mil ka ektaryang nadamyos tungod sa mga pagbaha nga nasinatian sa tibook rehiyon sa Caraga sa nakalabay nga semana. Apan dili pa kini mabati sa pagkakarun.
Tungod niini, gipasalamatan sa opisyal ang lokal nga mga mag-uuma sa padayon nga pagbaligya sa ilang mga palay ngadto sa National Food Authority.
