BUTUAN CITY – Gikumpirma sa Department of Health kon DOH nga duna nay usa ka ‘Patient Under Investigation’ kon PUI tungod sa Covid-19 ang Caraga Region samtang 36 na usab ang natalang ‘Persons Under Monitoring; kon PUMs.
Sa ekslusibong pakighinabi sa Bombo Radyo Butuan, gipadayag ni Dr. Jose Llacuna Jr., regional director sa DOH-Caraga, nga sa nasangpit nga ihap sa PUMs, 12 niini ang hugot nga gi-obserbahan sa ilang panimalay samtang ang nabiling 24 gitangtang na gikan sa ilang pag-obserbar human nakapasar sa 14-ka adlaw nga kwarantina.
Samtang anaa sa usa ka government facility ning rehiyon ang usa ka PUI kinsa wala na’y hilanat ug mga simtomas sa Covid-19 ug gihulat na lang ang resulta niini nga ipagawas gikan sa Research Institute for Tropical Medicine kon RITM.
Dugang pa ni Dr. Llacuna kontrolado nila ang sitwasyon sa Covid-19 sa rehiyon apan mihangyo gihapon kini sa katawhan nga itaho o bulotaryong muadto sa mga ospital ug Rural Health Unit ilabina kadtong dunay travel history sa mga apektdong nasud aron mapungan ang posibleng pagkaylap sa maong sakit.
