BUTUAN CITY – Dili apektado ang Caraga Region sa kamanduan sa Commission on Higher Education kon CHED-Caraga nga ihunong na ang pag-offer sa Senior High School kon SHS program diha sa mga state universities ingon man local colleges.
Sa eksklusibong pakighinabi sa Bombo Radyo Butuan, gibutyag ni Alma Sy Patron, ang acting regional director sa Commission on Higher Education kon CHED-Caraga, nga adiser pa gipakanaog ang kamanduan ni CHED chairperson Prospero de Vera niadtong Disyembre 18 tuig 2023, daan nang duna’y kamanduan nga ihunong na kini nga programa ilabina nga natapos na ang period sa pagpatuman niini base na sa memorandum of agreement tali sa ilang ahensya ug sa Department of Education nga dapat unta kutob ra niadtong school year 2020-2021.
Giklaro ni Patron nga tungod kay mao pa lamay pagsugod sa K-12 Program niadtong tuig 2016 kondiin gidugangan og grades 11 ug 12 ang high school, misugot ang CHED nga mu-augment sila sa DepEd ilabina nga wala usa’y mga 1st ug 2nd year students niadtong higayuna.
Apan giklaro ni Patron nga ang nagpabilin nga state university sa Caraga Region nga duna pa’y mga grade 12 students mao ang Surigao del Norte State University kon SNSU nga nahimutang sa Surigao City.
Hinuon, gimanduan na matud pa ang maong unibersidad sa ilang Board of Regents nga dili na mudawat pa og grade 11 enrollees alang sa school year 2023-2024 tungod kay pa-abuton na lang ang paggradwar sa ilang mga grade 12 students.
