BUTUAN CITY – All set na ang kapulisan sa rehiyon sa Caraga sa pagsugat ni PNP Chief Ronald Dela Rosa nga muabot karung Biernes aron saksihan ang ika-116 ka kasaulugan sa pagkamugna sa Police Regional Office kon PRO-13.
Sigon ni Police Supt. Martin Gamba, Chief Information Officer sa PRO-13, laumang ilahona sa maong selebrasyon ang nagkadaiyang police unit sa Caraga nga nag-perform sulod sa usa ka tuig diin gusto ni PNP Chief Dela Rosa nga siya mismo ang mutunol sa mga pasidungog.
Lakip usab nga kumustahon sa opisyal ang pagpatuman sa double barrel reloaded ug kampany sa illegal gambling.
Apan giklaro ni Gamba nga wala usab nila pasagdi ang ubang trabahoon, sama sa paghatag ug police service sa katawhan, sa pagbatuk sa dili lisensiyadong armas, sa pinangeta sa balaod, illegal logging ug ang pagmintina sa kahapsay ug kalinaw sa tagsa-tagsa ka lugar.
Samtang giklaro sa opisyal nga tungod sa kadako sa problema sa ilegal nga drugas, nagkinahanglan ang kapulisan sa tabang sa tanan aron hingpit kining masolbad.
Gitumbok niini ang paghatag ug impormasyon sa otoridad ug ang tabang diha sa rehabilitation program.
Gane, dunay mga aktibidad usab silang gipatuman aron masabtan sa katawhan ang ilang papel diha sa pagluwas sa mga nagumon sa ginadiling drugas.
