BUTUAN CITY- Nangandam na ang dakong bahin sa California tungod sa gilauman nga pag-abot sa kusog nga bagyo.
Sumala sa National Weather Service (NWS), kapin sa 11 milyon ka mga residente sa California ang maapektuhan sa maong bagyo. Pipila ka mga residente sa Palisades, Sunset, ug Hurst nga mga lugar gipabakwit na isip pag-amping.
Ang bagyo magdala og kusog nga hangin nga moabot hangtod 60 miles per hour ug posible usab nga mahimong tornado. Giawhag ni Los Angeles Mayor Karen Bass ang mga residente nga mosunod sa mga gimando sa lokal nga gobyerno kalabot sa pag-abot sa kusog nga bagyo. Gilauman usab nga magdala ang bagyo og lapad nga pagbaha sa Bay Area sa San Francisco.
Sumala sa mga meteorologist, posible nga magdala kini og lima hangtod walo ka talampakan nga yelo sa Sierra Nevada. Gilauman nga sa adlaw sa Huwebes, mopahilayo na ang bagyo gikan sa bahin sa California.
