BUTUAN CITY- “Calculated Move” matud pa ang gihimong pag-anunsyo ni Vice President Sara Duterte nga modagan kini isip Presidente sa 2028 election. Sa exklusibong pakighinabi sa Bombo Radyo Butuan, gibutyag ni Wilson Fortaleza, tigpamaba sa Partido Manggagawa, nga ang sayong pagpahibalo ni Vice President Sara usa ka lihok nga giingong kalkulado aron mapalig-on ang suporta sa iyang political base taliwala sa mga kontrobersiya.
Sigon pa niini, nga gikinahanglan ang maayong balita tungod si Duterte nag-atubangsa ikaduhang impeachment complaint samtang ang iyang amahan nga si Kanhi President Rodrigo Duterte mag-atubang usab sa trial karong Pebrero 23 ingon man ang daw pagkalakip sa listahan sa ICC nila Sen.Christopher “Bong” Go ug Sen. Ronald “Bato” dela Rosa.
Gibutyag usab ni Fortaleza, nga ang sayong deklarasyon giisip nga usa ka “warning shot” batok sa mga nagasuporta sa impeachment move, diin base sa survey si Vice President Sara ang adunay pinakataas nga numero alang sa 2028 presidency.
Dugang pa ni Fortaleza, nga si Vice President Sara Duterte mao gihapon ang nag-unang kandidato sa Duterte camp alang sa 2028 Presidential Election. Hinuon, sa tanang survey si Sara gihapon ang nag-una, samtang sa pikas nga grupo wala pa’y klarong kandidato gikan sa oposisyon gawas sa ilang mga panag-istorya ug pagpangandam sa pagpili sa ilang standard bearer. Gibutyag usab niini, nga taliwala paman sa iyang paguna-una, daghan pa gihapoy giatubang nga isyu ang Bise sama sa impeachment ug mga kaso sa Office of the Ombudsman lakip na ang kasong plunder.
Sumala pa ni Fortaleza, nga human sa pag-anunsyo ni Sara, bantayan na ang tanang lihok ug pamahayag niini, diin sumala matud pa sa pikas kampo, ang tanan nagahulagway sa iyang ambisyon nga mahimong presidente.
