BUTUAN CITY – Padayon karung gipangeta sa otoridad ang misibat nga miyembro sa Civilian Armed Forces Geographical Unit kon Cafgu nga nakapatay sa iyang kaubanan ra usab sulod mismo sa detachment sa may Sitio Asa-asa, Bangonay, Jabonga, Agusan Del Norte.
Sigon ni Police Lt. Jael Teroy, Hepe sa Jabonga Municipal Police Station, nahitabo ang insedente niadtong miyerkules sa gabii diin nagduty ang biktimang si James Tumilap Tumambad, 20-anyos nga taga Bayugan City, Agusan Del Sur.
Base sa imbestigasyon, gipukaw na sa biktima ang kaubanan niining si Jessie Porogoy Adyawan, 19-anyos nga taga Santiago, Agusan Del Norte tungod kay iya nang duty niadtong higayona.
Apan kalit matud pang gipusil ni Adyawan ang biktima nga na-igo sa tiyan og maoy hinungdan sa hinanaling kamatayon.
Nakuha sa otoridad sa nahitaboan ang 13 ka basyo sa bala apan giklaro nga usa lang ang samad sa biktima.
Sa karun padayon pang gipakisayran ang tinood nga hinungdan sa maong hitabo samtang dili usab makumpirma sa kapulisan ang impormasyon nga dunay kalambigitan sa ilimnong makahubog ang panghitabo.
Hinoon nagduda si Police Lt. Jael Teroy nga basin duna nay bikil ang duruha. Human sa hitabo, misibat ang suspetsado apan gibilin niini ang iyang isyu nga armas.
Sa karun, padayon pa ang hotpursuit operation ang kasundaluhang sakop sa 29th Infantry Battalion, Philippine Army batuk sa suspek. Gipaabot pa usab ang kabanay sa biktima alang sa hingpit nga pagpasaka ug kaso.
