BUTUAN CITY – Padayon pang gi-imbestigahan sa kapulisan sa Butuan City Police Station kon BCPS 4 ang pagpusil-patay sa mga armadong kalalakin-an ngadto sa usa ka CAFGU member sulod sa iyang pinuy-anan pasado alas-otso kagabii.
Gi-ila ni P/Sr. Insp. Ephraim Detoya ang biktimang si Saturnino Lumacang, 59-anyos, residente sa Purok 4, Sitio Iyao, Brgy. Anticala ning siyudad og kanhi membro sa rebeldeng New People’s Army og nahimong CAFGU member human sa iyang pagsurender.
Gibutyag sa opisyal nga nagtan-aw lang og TV sulod sa ilang panimalay ang biktima dihang kalit nga nanulod ang armadong mga lalaki dayong pusil kaniya sa nagkada-iyang party sa lawas hinungdan sa hinanali niining kamatayon.
Sa ilang pag-imbestiga sa asawa sa biktima, nasayran nga pipila sa mga suspek ang naka-bonnet samtang ang uban usab wala.
Gani, sa wala pa mahitabo ang maong insidente, nakadawat na matud pa kini og hulga sa kinabuhi. (Beth Ruiz)
