BUTUAN CITY – Padayon pa ang imbestigasyon sa kapulisan sa Butuan City Police Station 4 aron maila ug masikop ang responsable sa pagpusil-patay sa usa ka aktibong membro sa Citizen Armed Force Geographical Unit kon CAFGU pasado alas-6:15 sa gabii.
Gi-ila ni PCaptain Emmerson Alipit – tigpamaba sa Butuan City Police Office ang biktimang si Recto Mabasli, 50-anyos, minyo, residente sa Sitio Dinakpan, Brgy. Los Angeles ning siyudad sa Butuan og nadestino sa patrol base sa Brgy. San Antonio, lungsod sa RTR, Agusan del Norte.
Sa eksklusibong pakighinabi sa Bombo Radyo Butuan, gipadayag ni Captain Alipit nga gikan nagkuha og mangadyi-ay ang biktima alang sa nagkaduol nga death anniversary sa iyang anak kinsa gipatay usab niadtong Nobyembre 29 ning mi-aging tuig.
Diha na matud pa siya sa tugkaran sa ilang balay dihang giduol siya sa wala mailang responsable dayong pusil sa iyang ulo ug li-og hinungdan sa iyang hinanaling kamatayon.
