BUTUAN CITY – Gipa-ilalom na sa state of calamity ang siyudad sa Cabadbaran sakop sa Agusan Del Norte tungod sa hulga sa Coronavirus Disease 2019 kon Covid-19.kansa naka-angkla sa Sangguniang Panlungsod Resolution number 2020-034.
Tungod niini, otorisado na ang lokal nga kagamhanan nga ipagawas ang 30 porsiento nga Quick Response Fund kon QRF sa City Disaster Risk Reduction and Management Fund.
Nasayrang nakatala na ang siyudad og usa ka ‘Patient Under Investigation’ kon PUI samtang nagkataas usab ang ihap sa natalang nilang mga ‘Persons Under Monitoring’ kon PUMs nga mi-abot na sa 18.
Ang maong PUI gidala na ngadto sa Caraga Regional Hospital sa Surigao City alang sa mas subsob nga monitoring, quarantine ug pagtambal.
Una nang gisuspende sa lokal nga kagamhanan ang klase sa tanang ang-ang sa mga tunghaan aron masigurong mahipos na sa ilang pinuy-anan ang mga estudyante og dili na maglaroy-laroy pa nga maoy usa sa mga hinungdan sa paspas nga pagkaylap sa makamatay nga virus.
Apil sa gisuspende ang night market nga himuon kada-Biernes sa gabii kansa gipalagan sa mga vendors.
