BUTUAN CITY – Nagdumili pa paghatag og reaksyon ang lokal nga panggamhanan sa Cabadbaran City, lalawigan sa Agusan del Norte human gi-disbar sa Supreme Court ang abogado nilang konsehal tungod sa paglu-ib kon infidelity human nasuta nga nakakumitar kini og tulo ka extramarital affairs ug usa ka bigamous marriage.
Kini gumikan sa rason nga dili work-related sa ilang lokal nga paggamhanan ang nahitabo kang Lovejoy Quiambao, kinsa nahukmang guilty sa upat ka ihap sa kasong Grossly Immoral Conduct ilawom sa Code of Professional Responsibility and Accountability nga miresulta sa iyang disbarment.
Gipagawas sa high court ang 24-ka palid nga desisyon niadtong Hunyo 4 ug gawas sa pagtangtang sa iyang pangalan gikan sa Bar, gipamulta usab si Quiambao ug kinatibuk-ang P400,001 gikan sa matag-ihap sa grossly immoral conduct nga gilangkuban sa P100,001 sa second count ingon man tag-150 mil pisos sa ikatulo ug ika-upat nga ihap.
Nag-ugat ang reklamo gikan kang Merriam Rojas human nasayod gikan sa ilang katabang nga sekswal siyang gi-abuso sa abogado kansa nakumpirma sa reklamante human kini gi-angkon mismo ni Quiambao ngadto kaniya dayong butyag nga na-adik siya sa pornography ug dili makakontrol sa iyang paggamit nini.
Nagkasabot sila nga ipa-ilalom sa psychological intervention si Quiambao rason nga nagpahiling kini sa usa ka psychiatrist sa Cagayan de Oro City apan gipadayon gihapon ni Rojas ang iyang imbestigasyon hangtud nga iyang nasuta nga sekswal usab niining gi-abuso ang kanhi 13 nila ka mga empleyado nga nagtrabaho kanila isip katabang, secretaries, ug tindera kondiin duha niini, mga menor-de-edad.
Gawas pa kini sa lain pang mga insidenteng iyang nadiskubrehan nga maoy nag-aghat kaniyang magduso og petition aron makahangyo og protection order sa Regional Trial Court (RTC) sa Butuan City.
Gitugutan sa korte ang petisyon niadtong Pebrero 2017 ug nag-file usab siya petition for separation sa usa ka korte sa Agusan del Norte kansa nag-apruba sa ilang settlement agreement niadtong Marso 20, 2018, atol sa mediation.
Kini ang nag-dissolve ug nagtunga sa ilang mga kabtangan gikan sa ilang absolute community.
