BUTUAN CITY- Giklaro sa Cabadbaran City Health Office nga peke ang mga mikaylap nga impormasyon sa social media ilabina sa Facebook kalabot sa natala matud pa sa ilang syudad nga duna’y usa ka carrier sa Delta variant case.
Sa eksklusibong pakighinabi sa Bombo Radyo Butuan kang Roselyn Exaure, tigpamaba sa Cabadbaran City government, giklaro niini nga dili Delta variant ang natala sa ilang syudad kundi usa ka Beta variant nga dili kaayo maghatag og epekto sa lawas sa tawong mataptan niini.
Ang maong variant, natala pa niadtong Mayo base sa RT-PCR result niini apan nakarekober na.
Sumala pa ni Exaure, wala’y travel history ang maong kaso hinungdan nga mihimo og 2nd ug 3rd contact tracing ang mga contact tracers sa ilang syudad aron masiguro ang kaluwasan sa ilang katawhan.
Gipanawagan karun sa lokal nga kagamhanan sa Cabadbaran City ga hunungan na ang pagpa-ambit pa sa maong peke nga impormasyon aron dili malisang ang katawhan.
Samtang gitaho usab sa opisyal ang nahitabong State of the City Address kon SOCA ni Mayor Judy Chine Amante alayon sa tulo ka adlaw usab nga selebrasyon sa ika-14 nga anbersaryo sa City Charter Day sa Cabadbaran.
Naka-sentro sa pamahayag sa Mayor ang mga natapos sulod sa iyang administrasyon pinaagi sa lima ka development pillars nga naka-highligt sa brand name niini nga public service nga mao ang “Serbisyong Tinuoray, Serbisyong Walay Pili”.
Gani emosyunal pa kini tungod kay nahinumduman niini pagbalik ang mga kalisud nga naagi-an alang sa City Charter. Gitaho usab niini nga sunod tuig, mamahimong musaka pa ang Internal Revenue Allotment kon IRA sa maong syudad.
