BUTUAN CITY – Padayon pa ang manhunt operation sa kapulisan sa responsable sa pagpamusil kagabii sa P-5, Brgy. Tagbongabong, sa lungsod sa Remedios T. Romualdez (RTR) Agusan Del Norte.
Naila ang biktimang si Dante Besas 34 anyos, residente sa P-2 Brgy. Pianing ning syudad sa Butuan ug usa ka Civil Active Auxilliary kon CAA member nga kasamtangang nadestino sa usa ka detachment sa maong lungsod ubos sa 65th Infantry “Stalwart” Battalion, Philippine Army nga nakabase sa lungsod sa Sibagat, Agusan del Sur.
Sumala pa, nga dunay kalit lamang nga miabot nga tulo ka lalaki sa gipuy-an niini kansa gituohang sakop sa New People’s Army kon NPA dayon nagbutyag nga “dili molihok” dayon gipabuthan ang biktima sa kamot niini ug gidul-it pa ang armas sa dughan sa biktima og gipabuto hinungdan sa hinanali niini nga kamatayon.
Tungod niini, nakaangkon og samad pinusilan ang biktima sa kamot ug dughan niini.
