BUTUAN CITY – Hilabihan ang pagsubo karun sa pamilyang Mabasle sa may Sitio Dinakpan, Barangay Los Angeles, Butuan City human brutal nga gipatay sa rebelding New People’s Army ang amahan nga miyembro sa CAFGU Active Auxiliary kon CAA.
Natigayon ang pagpamusil sa biktima nga si Recto A. Mabasle, 50-anyos og nadestino sa Patrol Base sa Barangay San Antonio, Remedios Trinidad Romualdez (RTR), Agusan del Norte niadtong Nobyembre 28, 2019 sa alas 6:30 sa gabii.
Gipusil ang biktima sa gawas sa iyang panimalay sa mga NPA nga nagsakay sa single motor kolor pula ug puti.
Nakahiagum og 5 ka samad pinusilan sa kalawasan ang biktima nga maoy hinungdan sa iyang hinanaling kamatayon.
Gelayong misibat ang mga suspetsado human nasegurong nakabsan na sa kinabuhi ang biktima.
Nasayran nga naka-on leave ang biktima aron handumon ang unang death anniversary sa iyang anak nga si Gari Mabasle kansa miyembro usab sa CAA kansa napatay niadtong Nobyembre 29, 2018 human ang engkuwentro nga natigayon sa Sitio Kaunlaran, Barangay San Antonio, Remedios Trinidad Romualdez kon RTR, Agusan Del Norte.
