BUTUAN CITY – Gikumpirma ni Sec Vince Dizon sa Department of Public Works and Highways kon DPWH nga duna’y 11 ka mga air assets nga gipanag-iyahan si Rep Elizalde ‘Zaldy’ Co, base na sa rehistro nga anaa sa Civil Aviation of the Philippines kon CAAP nga sa kinatibuk-an, nagkantidad og ₱4.7B.
Sa iyang gipatawag nga press conference ning buntaga, gipadayag sa kalihim nga ang ilang nakuhang report, ilang isubmite ngadto sa Anti-Money Laundering Council (AMLAC); Department of Justice (DOJ) ug sa Independent Commission on Infrastructures (ICI) aron magamit sa sunod nga lakang nga ilang himuon.
Base matud pa kini sa hugot nga direktiba ni Pangulong Ferdinand ‘Bongbong’ Marcos Jr nga bawion ang tanang mga assets ug kwarta sa katawhang Filipino nga gikurakot sa mga opisyal sa gobyerno.
Pamatuod matud pa kini sa kamatinud-anon sa pangulo sa iyang kampanya kontra kurapsyon ug patubagon ang mga nalambigit niini.
Gani ang maong kalambuan, sinugdanan pa lang nga dili angayang dudahan sa katawhan tungod kay dili matud pa sila mu-undang kung dili makasuhan ang mga sad-an sa pagwaldas sa kwarta sa katawhan.
