BUTUAN CITY – Aminado si Pangulong Ferdinand Marcos Jr, nga duna na’y pipila ka mga personalidad siyang gi-istorya nga posibleng mudagan pagka-pangulo sa 2028 national elections.
Atol sa iyang pagtambong sa ASEAN Editors & Economic Opinion Leaders’ Forum nga gipahigayon sa Makati, gipadayag sa pangulo nga lisod ipasaka sa presidential level ang usa ka indibidwal nga wala’y kasinatian sa pulitika.
Apan iya usab nga giklaro nga dili pa panahon alang sa bisan unsa mang endorsement tungod kay mutuo siya sa panultihong “timing is everything.”
Gidugang pa sa pangulo nga kinahanglang ang mosunod nga lider sa nasud adunay lawom nga kahibalo o kamao sa ekonomiya.
Importante matud pa ang pagsabot sa ekonomiya aron makahimo og trabaho, makontrol ang pagsaka sa presyo sa mga palaliton o inflation, ug masiguro nga adunay igo nga suplay sa pagkaon kansa mahinungdanon sa pagpalambo sa edukasyon ug serbisyo sa panglawas aron mas mahimong mas maayo ang mga trabahante.
Sumala pa sa Presidente, kinahanglan nga ang usa ka lider tinuod nga nagmahal sa nasud ug nakatutok sa nation-building ug dili sa pulitika ug mas labaw nga importante ang kasinatian, kredibilidad, ug pagsalig sa publiko.
