BUTUAN CITY – Kung kita dinhi sa Pilipinas duna’y hibi-hibi nga mutikyop ang dahon kung hikapon, didto sa Japan, anaa usab ang ilang Diphylleia grayi nga duna’y pinasahing kalidad gawas sa ilang puti og rounded petals.
Kung tan-awon, yano lang kini apan ang nakapanindot niini mao ang iyang impresibong feature, kondiin ang mga petals niini nga kolor puti, mahimong translucent o transparent higayong maka-contact og tubig apil na niini ang ulan.
Sa bugnaw’ng kabukiran sa Japan, makita ang maong mga tanom kansa mas naila sa tawag nga “skeleton flowers”.
Ang mga puti niining petals mulagom atol sa ting-init apan kung ulanon, mahimo silang susama sa crystal rason nga daw kalag nang tan-awon ang maong mga buwak tungod kay kung sa tawo pa, makita og maklaro na man ang kalabera niini.
Gika-ingong ang abilidad sa buwak nga ma-usab gikan sa kolor puti ngadto sa translucent higayong matandog sa tubig, wala matud pa’y kalabutan sa pigmentation kondili tungod sa pagkawala sa cell structure sa plant petals.
