BUTUAN CITY – Gikumpirma ni Jocelyn Palaran nga taga Barangay Doongan ning siyudad sa Butuan ang iyang gi-estorya ngadto kang Pangulong Ferdinand Marcos jr sa dihang mibisita ang presidente dinhe sa dakbayan sa Butuan.
Sumala pa ni Palaran nga miyembro sa usa ka mag-uumang asosasyon, wala siya nagtoo nga sa iyang dapit moagi ang presidente aron sila kumustahon nga mga benipisyaryo sa makinaryas.
Sigon pa niini nga sa dihang naatubang niya ang pangulo, gikumusta sila diin gitubag niya kini sa pagpasalamat sa pag-anhe sa siyudad.
Wala usab niya gipalabay ang higayon sa pagpaabot sa iyang mulo mahitungod sa impormasyong nadawat nga matud pa katapusan na karung ting-tanom nga motabang ang Rice Competitiveness Enhancement Fund kon RCEF.
Personal nga gihangyu niini si Pangulong Marcos jr nga ipadayon ang maong programa tungod kay dakong tabang kini ngadto nilang mag-uuma. Dinhe nisaad ang pangulo nga ipadayon kini og palamboon pa nga iya usab nga gikalipay.
