BUTUAN CITY – Suspendido ning adlawa ang klase sa onse ka mga tunghaan ning siyudad sa Butuan tungod sa gikatakdang paglubong kang Butuan Diocese late Bishop Juan de Dios Pueblos karong alas-nueve sa buntag.
Kini human nagpagawas og Executive Order No. 39 si Butuan City Mayor Ronnie Vicente Lagnada aron wala kaayo’y problema sa trapiko sa sentrong bahin ning siyudad.
Sigon ni Eldy David – information officer sa Butuan City government, apil sa mga tunghaang suspendido ang klase ang Agusan Colleges, Agusan National High School, Butuan Central Elementary School, Butuan United Christian School, Father Saturnino Urios University (FSUU) main campus, Sacred Heart Kindergarten School, Saint Joseph Institute of Technology, Starland International School, Timber City Academy og Butuan City Colleges.
Gawas niini, gipaneguro usab ni David ang hapsay nga deployment sa mga personahe sa Butuan Transportation, Traffic and Management Office kon LTTMO og Butuan City Police Office kon BCPO aron magpabiling hapsay ang sentrong bahin ning siyudad alang sa lubong sa obispo.
Kagabii, gidugok sa bagang duot sa mga deboto ng simbahang Katoliko gikan sa nagkada-iyang panig sa Mindanao ang katapusang vigil sa obispo. (Beth Ruiz)
