BUTUAN CITY – Nagpakatag na og mga personahe ang Butuan City Police Office sa nagkada-iyang mga common-poster areas ning siyudad aron ma-monitor ang mga election paraphernalia nga gipangpilit o kaha gipangbitay sa mga kandidato sa Barangay ug Sangguniang Kabataan elections.
Kini subay na sa pagsugod ning adlawa sa campaign period kondiin gitugutan na ang mga kandidato sa pagpangampanya aron pag-awhag sa mga botante sa ilang tagi-barangay nga mubotar kanila. Sa eksklusibong pakighinabi ning sibyahan, gibutyag ni PCaptain Anne Cubio, tigpamaba sa Butuan City Police Office kon BCPO nga madunggan na sa kadalanan ang pagpangampanya na sa mga kandidato.
Usa matud pa sa ilang bantayan ang pagpataka lang og bitay sa mga campaign materials diha sa mga dili designated areas samtang andam usab silang mudawat og mga reklamo kalabot sa posibleng paglapas sa mga patakaran sa Commission on Elections nga gipatuman alang sa nagsingabot nga eleksyon apil na sa vote buying ug vote selling.
Sa pagkakaron, wala matud pa sila’y na-monitor nga mga hot spot areas panahon sa eleksyon apan dili gihapon sila mukumpyansa tungod kay padayon ang ilang monitoring. Ang ila matud pang ma-monitor nga nakalapas sa election laws, ilang ipa-abot ngadto sa Commission on Elections kon COMELEC-Butuan aron ma-aksyunan gilayon sa labing daling panahon.
