BUTUAN CITY – Gikumpirma ni Butuan City veterinarian Dr. Danilo Mancio Alegado nga luwas pa gihapon gikan sa African Swine Fever kon ASF ang siyudad sa Butuan ilabina nga wala pa makasulod ang maong sakit sa pulo sa Mindanao.
Sa eksklusibong interbyu sa Bombo Radyo Butuan, gipadayag sa opisyal nga duna’y mga nagsumbong kanila kalabot sa dili na mukaon nilang mga binuhing baboy apan dihang gisusi sa mga beterinaryo, nasayrang simpleng respiratory tract Infection lang ang sakit sa maong mga hayop.
Dugang ni Alegado, naggikan ang impeksyon sa ASF sa mga salin nga pagkaon gikan sa mga restaurants nga gipakaon sa mga binuhing baboy ilabina nga duna matud oa’y pipila ka mga produktong gikan sa infected countries ang apil niini.
Alayon niini, mi-apela ang opisyal sa mga restaurant owners nga ihunong una ang paghatag o kaha pagbaligya nila og mga salin nga pagkaon sa mga hog raisers.
Samtang tigumon ning adlawa sa Butuan City Veterinary Office ang mga meat vendors, mga personahe sa National Meat Inspection Service (NMIS) ug mga hog raisers ning siyudad aron klaruhon ang implementasyon sa memorandum order alang sa paglikay sa African Swine Fever.
