BUTUAN CITY – Aminado ang Taguibo Aquatech Solutions Corporation kon TASC, ang official bulk water supplier sa Butuan City Water District kon BCWD nga sama sa ubang lugar sa Pilipinas, nakasinati karon og krisis sa tubig ang ilang tuburan sa supply, ang Taguibo River tungod sa El Niño phenomenon.
Gipamatud-an kini sa TASC pinaagi sa pagpakita nila sa maong lugar ngadto sa Bombo Radyo news team kondiin dinhi naklaro ang kagamay na lang sa tubig sa dam nga na-uga tungod sa grabeng ka-init sa panahon.
Sa eksklusibong pakighinabi sa Bombo Radyo Butuan, gibutyag ni Bianca Camille Mañacap, ang Regulatory Affairs Officer sa TASC, nga tungod niini, ang ilang delivery sa tubig mag-agad lang sa supply nga tubig sa suba kondiin ang katapusan, anaa sa 36-million liters kada-adlaw kansa layo ra sa ilang contract obligation nga mu-abot sa 56 ngadto sa 60-million liters kada-adlaw.
Tungod niini, iyang gi-awhag ang tanang mga konsumidor sa tubig nga magdaginot ug dili mag-usik usik.
Aron ma-mitigate ang epekto sa El Niño phenomenon, gibutyag ni Mañacap nga ang tubig nga dili matud pa maka-abot sa ilang dam, ilang iproseso ngadto sa ilang water treatment plants.
Kini gawas pa sa ilang pakig-alayon ngadto sa Butuan City Water District ug sa lokal nga kagamhanan aron malabangan ang maong krisis pinaagi sa pagpangita og laing paagi sama sa paghimo ba kaha og cloud seeding.
Samtang gibutyag usab ni Eddie Richard Lagnada, ang presidente sa Taguibo Aquatech Solutions Corporation kon TASC nga swerte gihapon ang dakbayan sa Butuan bisan og apektado sa El Niño phenomenon tungod kay maka-abag man sa ilang water source nga Taguibo River ang suba sa Hilong-Hilong sa Cabadbaran City, Agusan del Norte.
Sa pakighinabi ning sibyahan, gibutyag sa opisyal nga padayon usab ang ilang pakig-alayon sa kadumalahan sa Butuan City Water District ug ang ilang paningkamot nga mabalanse lang ang water supply dayong hangyo sa ilang mga konsumidor nga batasanon na ang pagtigom og tubig.
