BUTUAN CITY – Padayong ipa-ilawom sa Modified Enhanced Community Quarantine kon MECQ ang dakbayan sa Butuan sugod karong Hulyo 1 hangtud 15 base na sa bag ong gipagawas nga quarantine classification sa Inter-Agency Task Force kon IATF kagabii nga gi-aprubahan usab ni Pangulong Rodrigo Duterte.
Kini tungod sa padayong pagsaka sa COVID-19 cases ning siyudad taliwa nga una nang gipa-ilalom sa susamang quarantine status ang siyudad sa sukad niadtong Hunyo 1 hangtud na sa hinapos ning bulana.
Tungod niini, padayon nga gamiton sa mga Butuanon ang ilang mga color-coded quarantine pass sa paggawas nila sa ilang pinuy-anan kondiin dili silla pasudlon sa mga establisamiento kung dili nila eskedyol sa adlaw nga tinggawas.
Magpadayon usab ang pagpatuman sa curfew hour ug padayong idili ang pag-display ug pagbaligya sa mga ilimnong makahubog.
Nasayrang sukad pa ning nakalabay’ng mga semana kanunay nga manguna ang dakbayan sa Butuan sa mga lugar ning rehiyon sa Caraga sa duna’y pinakataas nga kaso sa COVID-19.
