BUTUAN CITY – Gikumpirma ni Butuan City ug Agusan del Norte 1st District Representative Lawrence Lemuel Fortun nga wala’y misupak sa iyang gidusong House Bill No. 9000 atol sa ikatulo ug katapusang pagbasa kagahapon rason nga nakalusot na kini sa kamara.
Sa eksklusibong pakighinabi sa Bombo Radyo Butuan, gipadayag sa kongresista nga ang maong balaudnon maoy magdeklara sa Butuan isip Heritage Tourism Zone rason nga ma-apil na unya ang siyudad sa kinatibuk-ang pagplano alang sa tourism development sa nasud.
Sigon sa kongresista, bisan og gi-ila ang Butuan nga abunda sa kabilin, kultura ug kasaysayan apan wala kini maila isip usa ka tourism development area tungod na usab sa kawala’y regular nga pundong magamit sa pagpalambo niini.
Apan tungod sa maong deklarasyon, ang Department of Tourism uban sa National Historical Commission of the Philippines, National Museum of the Philippines ug National Commission for the Culture and Arts, mahatagan na og prayuridad ang Butuan alang sa tourism development planning ilabina kung masulod na siya sa tourism zones sa nasud.
Gidugang ni Congressman Fortun nga ubos sa iyang balaudnon, ang Department of Tourism muhimo gilayon og dinaliang test sa mga lakang alang sa ipatumang development plan nga I-incorporate sa National Tourism Development Plan.
Nasayrang apil sa katuyuan sa development plan alang sa Butuan ang pagsiguro sa restoration ug preservation sa mga historical ug cultural landmarks nin siyudad.
