BUTUAN CITY – Nanawagan ang Palasyo sa Malacañang sa Senado nga tumanon ang panawagan sa business community nga paspasan ang impeachment trial ni Vice President Sara Duterte aron mamintina ang kalig-on sa ekonomiya ug pagsalig sa mga investors dinhi sa atong nasud.
Kini isip tubag sa pamahayag ni House Prosecution Spokesperson Atty. Antonio Audie Bucoy nga mahimong ma-apektuhan ang kumpiyansa sa mga investors kung magdugay ang proseso sa impeachment trial ni Bise Presidente Sara Duterte.
Sigon ni Palace Press Officer USec. Claire Castro, na-alarma na matud pa ang mga sa sektor sa negosyo tungod sa langay nga impeachment trial, busa angayan nang mulihok ang Senado.
Matud ni Castro, dili ganahan ang mga investors nga mamuhunan sa nasud kung ang usa ka lider, mapasanginlan og kurapsyon ug daw gipaboran sa pipila ka senator-judges.
Gipanghimakak usab ni Castro ang pamahayag ni VP Sara nga nahugno ang ekonomiya sa Pilipinas ug pamatuod niini ang pagkatangtang sa Pilipinas sa gray list sa Financial Action Task Force nga nakahatag ug taas nga pagsalig sa mga mamumuhunan.
Gisaysay usab ni Castro ang taho sa Asian Development Bank (ADB) nga ang Pilipinas nagmintina sa maayong panglantaw sa ekonomiya alang ning tuiga.
Girespeto matud pa sa Malacañang ang panawagan sa business community nga paspasan ang impeachment trial ni VP Sara. Hinuon gisubli ni Usec Castro nga dili manghilabot si Presidente Marcos sa proseso sa impeachment sa Senado.
Gusto matud pa ni Pangulong Marcos nga sundon sa Senado ang Konstitusyon ug ang lagda sa balaod bahin sa impeachment.
