BUTUAN CITY – Padayon pang gi-ila sa kapulisan sa Bislig City, lalawigan sa Surigao del Sur ang identity sa duha ka lalaking namatay human gilamoy usab sa kalayo dihang midilaab ang ilang gisakyang motorsiklong human mipaslak ilalom sa bus.
Sigon ni Police Master Sergeant kon PMS Yudelou Gascon, imbestigador sa Bislig City Police Station, kalit nga mipaslak ilalom sa bus unit sa Bachelor Express Inc kon BEI ang motorsiklo pag-abot nila sa kurbadahong bahin sa Purok 2, Brgy. San Jose sakop sa maong siyudad rason sa pag-ulbo gilayon sa kalayo dayong pagawas sa tanang 19 ka mga pasahero sa bus.
Tungod sa kapaspas sa pagdilaab sa kalayo, wala na makuha pa sa mga tawo ang duha ka lalaking sakay sa motorsiklo rason sa ilang pagkapa-ig uban sa duha ka sakyanan nga midamay pa sa usa ka payag kilid sa dalan.
Gidugang sa opisyal, ila na matud pang giproseso ang identity sa duha ka angkas kansa gipahiluna na sa usa ka loal nga punerarya human miduol sa ilang buhatan ang nagpa-ilang ka-ubanan nila sa trabaho.
Dili matud pa nila makumapirma gilayon ang ilang identity samtang padayon pa nilang gipa-abot ang kabanay sa duha nga posibleng mu-claim kanila.
