BUTUAN CITY – Mimugna og komosyon sulod sa buhatan sa Bureau of Treasury kon BoT-Caraga ang wala pagsunod sa regional director sa gipakanaog nga kamanduan sa ilang sentrong buhatan nga magbalhin unta kaniya ngadto sa Region 12 samtang ibalik sa iyang biyaang pwesto ang gihulipan niya kaniadtong si Clara Aurelio.
Gipasabot ni Director Liza Pabolarcon nga human niya nadawat ang kamanduan gikan sa ilang sentrong buhatan niadtong Hunyo 12 ning tuiga, nagpadala gilayon siya og protest letter nga gihatud sa iyang abogado ngadto sa BoT-Central Office niadtong Hunyo 19.
Nakalatid sa sulat ang mga hinungdan nga dili niya madawat ang maong kamanduan sa rasong kwestyunable matud pa ang pagpabalik kang Aurelio sa maong buhatan tungod sa alegasyong kurapsyon nga gilambigitan niini dihang siya pa ang nagdumala sa nasangpit nga rehiyunal nga ahensya niadtong tuig 2006 hangtud 2014.
Gawas niini, wala matud pa’y gihimong aksyon ang ilang sentrong buhatan sa isyung gilambigitan ni Aurelio. Bisan matud pa sa kadugay na sa iyang gipadalang protest letter apan hangtud karon wala pa siya’y nadawat nga tubag gikan sa ilang central office.
Dili matud pa lalim ang gihimong kahiwian ni Aurelio dihang gidumala niini ang ilang regional office tungod kay siya na ang nakasawo sa epektong hatud sa hiwi niining binuhatan.
Gihimong ehemplo ni Pabolarcon ang pag-isyu sa Commission on Audit kon COA ngadto kaniya og duha ka mga notice of disallowances.
Kini tungod matud pa sa pag-purchase kaniadto ni Aurelio og surplus nga transformer nga mibuto og ang pagpalit niini og overpriced nga generator set sa Davao City kansa dili na magamit gawas nga abudado kini sa mga tawo. (Beth Ruiz)
