BUTUAN CITY – Nasubay na sa Bureau of Immigration (BI) ang pamaagi o modus sa Self-Confessed og kanhe Davao Death Squad hitman Edgar Matobato para makabiya kini sa Pilipinas.
Una nang gibutyag nga si Matobato mibiya gikan sa Pilipinas paingon sa wala mailhan nga dapit gamit ang passport nga lain ang pangalan. Matod sa tigpamaba sa BI nga si Dana Sandoval, naila na sa ahensiya ang modus nga gigamit ni Matobato lakip na ang ngalan nga iyang gigamit, apan sa pagkakaron dili una kini ipagawas sa publiko.
Sumala pa niini nga ila una nga isumiter ang mga nadiskobrehan nga impormasyon ngadto sa tukma nga mga awtoridad sa dili pa kini ipagawas sa publiko.
Matod pa ni Sandoval, ila usab nga gisusi kon nausab ba ang pisikal nga panagway ni Matobato dihang nibiya kini sa nasod. Sa gibutyag sa usa ka international news organization nga nakabase sa US, duha ka pari nga Katoliko ang mitabang kang Matobato sa pagbiya sa Pilipinas paingon sa Dubai.
Gikan sa Dubai, mibiyahe na usab sila paingun sa dapit nga wala na gibulgar pa. Sa laeng bahin, unang gibutyag ni kanhi Senador Leila de Lima nga si Matobato anaa na sa protective custody sa International Criminal Court (ICC).
Matod sa kanhi senador, niadtong ikaduhang quarter sa 2024 mibiya sa Pilipinas si Matobato tungod kay ang ICC naningkamot nga maabot siya alang sa nagpadayon nga imbestigasyon sa batok sa war on drugas ubos ni kanhi Presidente Rodrigo Duterte, lakip na ang giingong sunodsunod nga pagpamatay nga gihimo sa kontrobersyal nga DDS.
Si De Lima kaniadto nagserbisyo isip secretary sa Department of Justice ug chair sa Commission on Human Rights, kinsa mao usab ang unang mipresentar kang Matobato isip saksi batok ni kanhi Presidente Duterte sa imbestigasyon sa Senado niadtong 2016.
