BUTUAN CITY – Gikumpirma ni Captain Francisco Garillo – Civil Military Operations kon CMO officer sa 26th Infantry Battalion, Philippine Army nga usa ka buntis nga ginang ang patay sa pagpang-harass nga gihimo sa mga rebeldeng New People’s Army kon NPA sa Bitaugan Detachment sa Brgy Bitaugan sakop sa lungsod sa San Miguel probinsya sa Surigao del Sur kaganinang alas-12:35 sa kaadlawon.
Sa eksklusibong pakighinabi ning sibyahan, gi-ila sa opisyal ang biktimang si Jennyfer Maca, 25 anyos, minyo kinsa na-igo sa bala sa AK-47 rifle diha sa iyang dalunggan nga milusot sa taas nga bahin sa iyang ulo.
Nasayrang mu-abot matud pa 20 ka kumunistang terorista ang mi-harass sa maong detachment nga miresulta sa 15 ka minutos nga engkwentro.
Gibutyag sa opisyal nga ang maong pag-atake, nagpakita lang matud pa sa kawala’y pagpakabana sa mga rebelde tungod sa nadamay nga sibilyan kansa klarong paglapas matud pa sa CARHRIHL kon Comprehensive Agreement on Respect to Human Rights and International Humanitarian Law nga gipirmahan sa CPP-NPA-NDF ug Government of the Republic of the Philippines. (Beth Ruiz)
