BUTUAN CITY – Natala sa Philippine Institute of Volcanology and Seismology kon PHIVOLCS ang padayon nga strombolian activity ug mubo nga lava fountaining sa Bulkang Mayon kaganinang buntag.
Nagsugod ang aktibidad alas-3:32 sa kadlawon ug milungtad hangtod alas-7:10 sa buntag. Ang strombolian activity usa ka mild-to-moderate nga explosive eruption diin sunod-sunod nga nagpagawas ang bulkan og nagbaga-bagang lava, aso, ug uban pang volcanic materials.
Sumala sa PHIVOLCS, kini na ang ika-70 ka adlaw sa padayon nga pag-alburuto sa Mayon sukad kini gisaka sa Alert Level 3. Padayon gihapon ang pag-agas sa lava ug pyroclastic density currents (PDCs) o uson, apil na ang mga rockfall events diin dagkong tipak sa lava ang nahulog gikan sa tumoy nga bahin sa bulkan ngadto sa managlahing slopes.
Tungod niini, hugot nga gibawal ang pagsulod sa 6-kilometer Permanent Danger Zone (PDZ) sa bulkan.
Sa pinakabag-ong report sa PHIVOLCS, nakatala usab sila og kapin sa 150 ka mga volcanic earthquakes ug upat ka lava collapse events gikan Marso 10 hangtud kagahapon, nga nagpakita sa padayon nga paglihok sa bulkan.
Nagpabilin nga alerto ang lokal nga mga awtoridad sa Albay ug andam ang mga evacuation centers kung mugrabe pa ang sitwasyon.
