BUTUAN CITY – .Otsienta’y singko porsiento nang natapos ang water treatment facilities nga gitaud sa Nasipit Water District sa Nasipit, Agusan del Norte sa may Kinabjangan River.
Kini aron matubag na nila ang pila ka tuig nang problema sa water supply ngadto sa ilang mga concessionaires kinsa dugay nang nagmulo tungod sa pila ka oras lang nga pagpa-agas niini kada-adlaw.
Sa eksklusibong pakighinabi sa Bombo Radyo Butuan, gipadayag ni general manager Janice Mira nga ang kanihit sa supply sa tubig, problema matud pa sa tibuok nasud og dili lang sa ilang lugar rason nga gipangitaan nila kini og solusyon.
Pinaagi matud sa maong water treatment facilities, lima ka mga filter media nga tag-1.5-milyunes pesos ang kantidad matag-usa, na ang nangabot sa ilang buhatan.
Sa maong mga filter media matud pa mu-agi ang iproseso nilang tubig adiser nila i-deliver ang supply niini.
Sa pagkakaron, nagkabot na lang sila sa maong suba aron ilang ma-interconnect ang mga pipelines gikan sa filter media ngadto na sa mga transition lines.
Gipasabot ni Mira nga bulk water supply ang maong proyekto kondiin mupalit sila og tubig gikan sa contractor nga mao nay mu-filter sa kuhaong tubig gikan sa source niini.
Gisugdan kini niadtong Enero 31 ning tuiga human gipirmahan ang balor 38-milyunes nga kontrata rason nga nangayo kini og dispensa sa tanan nilang concessionaires dungan sa pag-apela nga hulatan na lang nga matapos ang proyekto aron mubalik na sa normal ang ilang paghatud og supply niini.
