BUTUAN CITY – Gikumpirma ni Butuan City Councilor Ferdinand ‘Daddy Ferds’ Nalcot nga nag-self quarantine siya karon sulod sa 14-ka adlaw human nagpositibo sa rapid test ang duha ka staff sa iyang opisina.
Sa eksklusibong pakighinabi sa Bombo Radyo Butuan, gibutyag ni konsehal Nalcot nga human nagpakita ang iyang staff og simtomas sa sakit nagpahigayon gilayon sila og rapid testing ug nasuta nga dunay duha ka staff niini ang nagpositibo sa sakit.
Tungod niini, sugod karong adlawa temporaryo usab nga isira ang iyang opisina aron hatagan og dalan ang pag-disinfect niini isip pagtamod na sa health protocols ug mabalik lang ang pag-abri niini higayong makompleto na ang 14-ka adlaw nga kwarantina nga walay komplikasyon ug luwas na gikan sa hulga sa maong virus.
Sumala sa opisyal nag-self quarantine ang iyang mga staff aron masigurong makalikay sa posibleng tinadakdanay taliwa nga positibo lamang sa rapid testing ang duha sa iyang staff.
Gipadayag sa opisyal nga nakig-alayon na sila sa mga hingtungdan ahensya ug gitambagan na sa mga angay nga buhatan samtang naghulat nga makuhaan og swab sample alang sa confirmatory result bisan og wala magpakita og bisan unsang simtomas sa sakit.
Gipadayag usab sa opisyal nga taliwa sa temporaryong pagsira sa ilang opisina, magpadayon gihapong functional ilang serbisyo pinaagi sa online nga dumalahon sa ubang staff nga wala kaayo naapektuhan sa panghitabo.
Sa katapusan nanawagan ang opisyal sa tanang katawhang Butuanon nga dili mag-kumpyansa ug himuon ang tagsa-tagsa ka responsilibilidad pinaagi sa pagtuman sa mga gikantar nga health measures ug seryusuhon ang kasamtangang sitwasyon.
