BUTUAN CITY – Gipadayag ni Michael Angelo Agbulos, Agriculturist II sa Regulatory Division sa Department of Agriculture kon DA-Caraga nga dunay pagkaylap karon sa sakit sa saging sa Taganaan, Surigao del Norte nga gitawag og bugtok diin ang bunga gahi ug naay puntik-puntik maong dili kini pwede makonsumo sa tawo.
Base kini sa pagkumpirma sa Monitoring and Surveillance Section ngadto sa laboratory sa Regional Crop Protection Center sa Caraga Region sa may Trento, Agusan del Sur.
Ang hinungdan sa pagkaylap sa bugtok mao ang bacteria nga nadala sa hangin o sa mga insekto sama sa mga buyog. Sigon ni Agbulos, masumpo kini pinaagi sa sanitation o kanunay nga paghinlo sa palibot ug kinahanglan usab ang pagputos sa puso sa saging.
Gawas sa bugtok sa saging, daghan pa nga sakit sa tanom ang gi-monitor sa Monitoring and Surveillance Section sa Regulatory Division diin makatabang nga malikayan ang pagkaylap sa mga sakit ug peste sa kaumahan.
