BUTUAN CITY – Gipahibalo na sa K-Pop superstar nga BTS ang ilang comeback world concert tour nga magsugod sa bulan sa Abril karong tuiga, human sa pagpagawas sa ilang bag-ong album.
Gipagawas sa music label sa BTS nga BigHit Music ang mga petsa ug lugar sa concert tour sa grupo, nga adunay 79 ka shows sa Asia, United States, ug Europe kansa magsugod sa usa ka tulo ka adlaw nga concert sa Goyang, South Korea sa Abril.
Bisan pa nga naka-iskedyul pa sa sunod tuig, nagpakita na og dakong kalipay ang mga Filipino ARMY tungod kay naapil ang Manila sa world tour sa BTS, nga gikatakda sa Marso 13–14, 2027.
Gitawag usab sa media ang concert tour sa BTS nga “pinakadakong K-Pop tour sa tanang panahon.” Kini ang unang world concert tour sa grupo human sa upat ka tuig, sukad sa ilang “Permission to Dance on Stage” concert series sa Seoul, Los Angeles, ug Las Vegas tali sa 2021 ug 2022.
Kini usab ang unang higayon nga mag-perform ang BTS nga kompleto sa entablado human nila malampuson nga nahuman ang ilang mandatory military service gikan 2022 hangtod 2025.
