BUTUAN CITY – Nakuha na pagbalik sa Agusan del Norte Provincial Jail ang usa nila ka person deprived of liberty, wala ra’y 24-oras human kini mi-eskapo tungod sa subsob nga manhunt operation nga ilang gilusad.
Sa eksklusibong pakighinabi sa Bombo Radyo Butuan, gibutyag ni provincial jail warden Fermin Antenorio nga ang intelligence unit sa kapulisan maoy malampusong nakarekober kang Charlie Adlawon Rafael nga taga-Brgy. Simbalan, Buenavista, Agusan del Norte human ang pag-surveillance sa mga lugar nga posible niyang taguan.
Dugang ni Antenorio, wala matud pa magpakita og pagsukol si Rafael dihang gipahibalo siya nga subli siyang dakpon ug nadugangan pa sa daw drama sa telebisyon ang senaryo tungod kay ang bugtong pangandoy lang sa maong eskapo nga makita ang iyang anak, natuman man human nga ila kining gidala.
Grabeng gakus og hilak ni Rafael dihang nakita ang iyang 6-anyos nga anak nga lalaki nga ila pang gi-uban hangtud sa provincial jail, base na usab sa hangyo sa maong piniriso kondiin gi-isolate sila kagabii aron maka-uban niini sa pagkatulog ang iyang anak.
Tungod sa pagsibat ni Rafael, duna na’y limitasyon ug reservation sa pagtagad nga una nang gihatag kaniya tungod kay dili na siya mahimong trustee.
Gipa-ilalom na usab siya sa psychological intervention aron mas maplastar ni Rafael ang iyang kaugalingon ug ang iyang huna-huna samtang malayo siya sa iyang anak.
Nagpasalamat usab siya sa mga barangay officials sa Brgy Simbalan, ug tanang nakatabang aron ilang makuha pagbalik si Rafael ilabina sa Bombo Radyo nga nakatabang aron ma-aware ang mga tawo sa maong panghitabo.
