BUTUAN CITY – Duna nay person of interest ang kapulisan sa brutal nga pagpatay sa usa ka magtutudlo nga nakaplagan nalang ang patay’ng lawas alas 10:50 sa gabii sa may Purok-2, Barangay Baan km-3 ning siyudad sa Butuan.
Giila ni Police Executive Master Sergeant Rey Gabrielle Maderal, Public Information Office sa Butuan City Police Station-1 ang biktima kansa miyembro sa LGBT Community nga si Leonardo Basan Acejo, 44-anyos, residente sa Las Casas Subdivision, Baan Kilometer 3, Butuan City og magtutudlo sa pribadong tunghaan kansa usa pa ka awardee.
Sumala pa sa opisyal, base sa gihimong post mortem examination dunay 5 ka samad dinunggaban sa nagkadaiyang parte sa lawas ang biktima gawas pa sa pagpospos og bato ngadto sa ulo sa biktima rason sa iyang kamatayon.
Gane nagkadugo pa ang bato nga nakita sa lugar nga nahitaboan sa kremin. Sa pagpalawom sa imbestigasyon, duna nay mga saksi nga mihatag sa ilang testimonya nga gidugangan pa sa screen shot sa mga chat sa biktima diha sa group chat adiser pa ang panghitabo.
Gihikay na karun ang mga dokumento sa pagpasaka og kaso batuk sa person of interest. Sumala pa ni Maderal nga daw igo lang gitawag ang biktima anang gabii aron makahimamat sa mga person of interest.
Gane naka-pajama na ang biktima. Apan sa karun wala pay na-establisar silang motibo sa maong ngil-ngig nga kremin.
