BUTUAN CITY – Sa pinaka-unang higayon, mitala na og kumpirmadong kaso sa COVID-19 ang Brgy. Urduja ug Manila de Bugabos ning siyudad sa Butuan base sa pinaka-ulahing listahan sa DOH-Caraga nga gipagawas kagahapon.
Sa gipagawas nga datus sa ahensya, ang siyudad sa Butuan mitala og pito ka mga bag-ong kaso kondiin unom niini ang local transmission samtang usa ang Returning Overseas Filipino kon ROF.
Sa eksklusibong pakighinabi sa Bombo Radyo Butuan, gipadayag ni Michiko de Jesus, tigpamaba sa Butuan City government, ang ubang mga bag-ong kaso, natala sa Brgy. Bancasi, Libertad, Doongan ug San Vicente.
Alayon niini, nakatala na ang siyudad og cumulative cases sa COVID-19 positive nga mi-abot sa 113 kondiin 89 niini ang na-discharge na samtang 23 ang pabiling aktibo.
Subay niini, gihangyo sa opisyal ang mga bag-ong barangay nga nakatala na og kaso ng magmatngon kanunay aron malikayan ang local transmission pinaagi sa pagsunod sa advisory ning siyudad.
Partikular niini ang istriktong pagsunod sa mga health protocols sama sa pag-obserba sa social distancing, pagsuot kanunay og face mask og dili pagawason sa balay ang mga bata.
Gikumpirma usab ni de Jesus nga sa 36 ka mga barangay ng gipa-ilalom sa modified enhanced community quarantine ning mi-aging Hulyo 28 hangtud Agusto 10, 13 pa ang duna’y kumpirmadong aktibong kaso sa coronavirus.
Alayon niini, hulatan pa ang mamahimong desisyon ni Mayor Ronnievic Lagnada sa ubang 23 ka mga barangay nga apil sa MECQ apan wala na’y kaso sa COVID-19.
