BUTUAN CITY – Aminado si Kapitan Delia Tingas sa Brgy. Basag ning siyudad sa Butuan nga iyang nakumbinsi ang suspetsadong si Dondon Acedo pagtug-an sa tinuod dihang iya kining gisultihan nga ang pagpa-ubos lang sa sentensya ang iyang matabang kung angkunon niini ang maong kremin human kini unang nangulipas.
Sa eksklusibong pakighinabi sa Bombo Radyo Butuan, gibutyag ni Kapitan Tingas nga milig-on ang iyang pagduda nga kini ang responsable sa kremin human nakita sulod sa pinuy-anan niini nga ilang gisuhid ka-uban ang duha niya ka mga constituents, ang basa ug puno sa lapok nga pantalon.
Gidala matud pa niya kini ngadto sa mga naka-inom sa suspetsado ug gipakita kondiin nakumpirmang mao kini ang gisuot sa suspek atol sa ilang panag-inom sa gabii nga nahitabo ang kremin.
Nadugangan pa kini sa nakita nilang t-shirt nga nawala human unang nakita duol sa crime scene ug nakumpirma nga iya usab sa suspetsado kinsa dihang mi-angkon na sa kremin, dinhi daw mibuto matud pa ang iyang dughan sa kasakit.
