BUTUAN CITY – Padayon pang gipanubayan sa kapulisan sa lungsod sa Trento, Agusan del Sur ang nahimutangan karon sa kapitan sa Brgy. Pangyan uban sa iyang asawa human matud pa sila gidagit sa wala pa mailang grupo ning mi-agi pang semana.
Gi-ila ni P/Sr. Insp. Melvin Rufon, ang magti-ayong sila Rene Carlos, 36-anyos og Maribeth Carlos.
Ulahi na nilang na-categorize nga gidagit ang duruha tungod kay dili na man sila gawasnong makabiya sa dapit nga gidalhan kanila aron unta makapa-uli na.
Sa ilang nakuhang impormasyon, duna matud pa’y gipakigkitaang mga indibidwal ang nasangpit nga magti-ayon kinsa wala na gipapa-uli og gidala sa wala matumbok nga lokasyon.
Gitu-uhan sa ilang pwersa nga mga sakop sa Front Committee 20 sa New People’s Army kon NPA ang midagit sa magti-ayon tungod kay ang maong grupo matud pa maoy nag-operate sa nasangpit nga lugar. (Beth Ruiz)
