BUTUAN CITY – Gibarugan ni Butuan City Ampayon Brgy. Kapitan Rodencio Basubas Jr. nga dili niya sundon ang nakalatid sa certification gikan sa Department of Interior and Local Government kon DILG tungod kay tubag lang nila kini gikan sa hangyo ni 1st Brgy. Kagawad Danilo Maisog subay na sa gipagawas nga preventive suspension order sa Sangguniang Panlungsod nga pirmado ni Mayor Ronne Vicente Lagnada.
Sa eksklusibong pakighinabi sa Bombo Radyo Butuan, gipadayag ni Kapitan Basubas nga wala siya’y angayang sundon sa maong sertipikasyon tungod kay dili kini order kon kamanduan aron iyang itugyan kang Kagawad Maisog ang iyang posisyon.
Sigon ni Kapitan Basubas, dili niya respetuhon ang suspension order base na usab sa tambag sa iyang legal counsel nga si Atty. Ronnel Azarcon sa rasong ilegal ang sunod-sunod nga pagsuspende nga mu-abot sa 90 ka adlaw sulod sa usa ka tuig base matud pa sa nakalatid sa Section 127 sa Local Government Code.
Nagduso na matud pa sila og temporary restraining order kon TRO rason nga kinahanglan pang hulaton ni Kagawad Maisog ang kamanduang ipagawas unya sa korte nga maoy ilang sundon.
Samtang gibarugan usab ni acting Ampayon Brgy. Kapitan Danilo Maisog nga mutuman siya sa sertipikasyong gihatag kaniya sa DILG aron dili siya ma-akusahan og pag-abandona sa iyang posisyon.
Andam matud pa siyang mutabang aaron maplastar ang ilang bangi karon ilabina nga siya nag-opisina sa ubos nga bahin sa ilang barangay hall samtang si Kapitan Basubas dito usab sa taas nga bahin.
Hugot nga gipadayag niining sundon niya ang gihatag nga sertipikasyon sa DILG susama sa iyang pagsunod kaniadto dihang nagkayagaw usab ang liderato sa ilang barangay ning mi-aging mga buwan tali nila kanhi Kapitan Dennis Felix Gonzaga dihang gisuspende si Basubas.
