BUTUAN CITY – Nakatabang sa pagdaghan sa mga turista ang swimsuit competition sa Miss Universe Philippines 2026 nga gipahigayon sa Boracay Islands.
Sigon ni Kathline Licerio, administrative officer sa Malay-Boracay Tourism Office, daghang mga local ug foreign tourists ang bisita ang niadto sa isla aron mutan-aw sa pagrampa sa mga kandidata, mao nga nisaka ang occupancy sa mga hotels ug resorts.
Dako usab og tabang ang event sa pag-promote sa Boracay, kay daghan kini og exposure sa social media ug sa international audience.
Ang 51 ka kandidata nagpakita sa ilang confidence ug stage presence sa swimsuit segment nga gihimo sa Aqua Boracay, nga mas nagpalig-on sa imahe sa isla isip maayong lugar alang sa mga world-class events.
Sa wala pa ang swimsuit competition, nag-coastal clean-up pa ang mga kandidata isip bahin sa ilang community service kondiin nanghipos sila og basura sa sikat nga white beach sa isla.
Sukad 2023, kabahin na sa pageant ang pagbisita sa Boracay, apil ang outreach programs ug swimsuit competition. Ang swimsuit competition usa sa mga highlight sa pre-pageant activities ug makatabang sa pagpili sa semifinalists.
Ang grand coronation mahitabo sa Mayo 1, sa Mall of Asia Arena, diin ipasa ni Ahtisa Manalo ang korona sa sunod nga reyna nga morepresentar sa Pilipinas sa Miss Universe nga himuon sa Puerto Rico karong Nobyembre.
