BUTUAN CITY – Gidugok ang Bombo Radyo Butuan broadcast center sa mga residente ning siyudad nga nagtinguhang makabaton og kaugalingong reading eye glasses tungod kay libre kining gipanghatag kanila.
Sugod pa lang kaganinang buntag hangtud ning mga orasa, wala’y paghubas ang pagdalikyat sa mga tigpaminawan dinhi ning sibyahan.
Isip pagsunod usab sa health protocols, gi-obserba gihapon ang social distancing alang sa pagsukod sa grado sa ilang mata samtang suot ang face mask.
Samtang ang mga senior citizens, midalikyat ning sibyahan nga duna’y bitbit nga chaperon ug emergency pass gikan sa mga barangay nga ilang gigikanan.
Pulos pagpasalamat ang ilang nalitok gumikan kay gawas nga libre, dakong tabang na kini sa hanap-hanap na nilang panan-aw ilabina kung magbasa.
Alang niadtong nagproblema sa ilang panan-aw, mamahimo kamong mudalikyat dinhi sa broadcast center aron makapasukod kamo sa inyong gikinahanglang reading eye glasses.
