BUTUAN CITY – Gitunol sa Department of Social Welfare and Development kon DSWD-Caraga ngadto sa Bombo Radyo Butuan, ang Most DSWD – Supportive Radio Station award. Atol kini sa ilang 2024 PANATA ko sa Bayan Awards kaganinang buntag nga gipahigayon sa Watergate Hotel ning siyudad sa Butuan.
Kini isip pag-ila sa dili matupngang suporta ning sibyahan sa pagpakaylap og mga impormasyon kalabot sa mga programa ug serbisyong gitunol sa Department of Social Welfare and Development ngadto sa tanang sektor sa katilingban.
Ang pasidungog, gidawat ni acting assistant station manager Bombo Rey Brangan.
Gawas sa paghatag og impormasyon, tumong usab niini nga subling mahatdan og komunikasyon ang sibyahan aron mapa-abot pa ngadto sa katawhan ang mga proyekto ug programa sa kagamhanan.
Ang PANATA awarding kabahin sa ika-74 na anibersaryo sa DSWD.
