Bombo Radyo, bugtong radio station nga gipaminawan sa tibuok Surigao City sa linog updates
BUTUAN CITY – Dako ang pagpasalamat sa lokal nga kagamhanan sa Surigao City ngadto sa Bombo Radyo Philippines tungod sa wala’y hunong nga paghatud niini og mga impormasyon ilabina sa mga updates sa linog nga mi-igo sa ilang siyudad ning mi-aging gabii.
Gibutyag ni Vice Mayor Alfonso Casurra nga ang Bombo Radyo Butuan lang ang bugtong sibyahan sa radyo nga gipaminaw sa katawhan sa tibuok Surigao City hinungdan nga updated silang tanan sa mga panghitabo.
Ang Bombo Radyo matud pa ang ilang dangpanan aron mapa-abot ang ilang problema og panginahanglan niining panahuna kansa dali usab matubag sa nasudnong kagamhanan pinaagi sa mga hingtungdang rehiyunal nga ahensya.
Tungod sa serbisyong gihatag sa Bombo Radyo, nanghinaut ang opisyal nga makahimamat ang mga personahe ning sibyahan aron mapasalamatan sa gihimo niini sa ilang lugar. (Beth Ruiz)
