BUTUAN CITY – Dili malimod nga pila ka higayon na kita nakasaksi sa away sa atong mga Pinoy boxers nga unta maoy gitu-uhan natong mudaog apan pildi diay ug usa na niini ang away nila Pacman ug Floyd Mayweather Jr nga sa atong pagtuo si Pacman ang mudaog tungod sa pagsige og dagan ni Mayweather.
Apan lahi ang nahitabo sa atong pambato nga si Pinoy boxer Renan Portes kinsa nadesisyunan nga napildi ni World Rank Bantamweight Contender Keita Kurihara pinaagi sa split decision sa ilang away niadtong Lunes, Hulyo 22.
Ang nakakurat tungod kay inay mangmaya ug isinggit sa tibuok kalibutan ang iyang kada-ugan, nagsige na hinuon kini’g hilak ibabaw sa ring ug nagbutyag nga si Portes ang midaog sa ilang away dayong saad nga iyang protestahan ang iyang kada-ugan.
Bisan og gihatag sa mga judges ang kada-ugan ngadto kang Kurihara apan dili siya kontento sa iyang performance rason nga dili niya madawat ang iyang kada-ugan.
Human niini, gibisita ni Kurihara si Portes sa iyang locker room ug nangayo og pasaylo rason nga nahimo usab nga emosyunal ang Pinoy boxer dayong butyag nga iya diay nga gisaad ngadto sa iyang anak ang kada-ugan sa maong away.
